伊巴式嘅入波，來自伊巴嘅助攻，今次嘅主角係米希達利恩（MK恩）。呢位阿美尼亞足球先生喺拆禮物日嘅英超，接應伊巴謙莫域嘅傳中，以一記飛身蠍子擺尾勾射，攻破「黑貓」新特蘭大門，助曼聯主場贏3:1，聯賽四連勝。可能呢球波太精采啦，旁證都睇到目瞪口呆，留意唔到MK恩原來越位在先。
越位在先球證走漏眼
曼聯呢場面對前主帥莫耶斯領軍嘅新特蘭，全場圍攻，伊巴喺39分鐘助攻戴利白蘭特開紀錄。82分鐘，保羅普巴把握對手失誤，傳畀伊巴半單刀埋門，呢位35歲瑞典老將射成2:0。伊巴一向係球壇特技人，專入啲高難度世界波，似乎感染咗隊友MK恩。喺86分鐘，伊巴右路傳中，後備入替嘅MK恩前柱入楔，但人前波後，點樣好？佢好似伊巴上身咁，凌空施展蠍子擺尾，就將個波勾咗入網。呢球波令人O嘴程度可以同哥倫比亞門將希基達嘅蠍子尾救波，同埋港將法圖斯嘅蠍子尾烏龍齊名。MK恩賽後話：「呢個係我入過最靚嘅入波！我原本以為個波會喺我前面，點知佢去咗後面，我唯一可以做嘅就係博一博起後腳。」美中不足嘅係原來MK恩越位在先，可能旁證都睇到呆咗，冇舉到旗，曼聯拉開到3:0。
伊巴追美斯入波紀錄
喺補時一分鐘，波連尼幫新特蘭破蛋嗰球都係靚波，佢喺禁區頂心口一控，右腳一拉，個波直飛死角。最後，曼聯主場贏3:1，聯賽連贏四場。領隊摩連奴話呢球蠍子尾世界波可以幫到傷癒復出嘅MK恩增強信心。
另外，伊巴喺2016年已經為球會（曼聯同巴黎聖日耳門）射入50個波，係得51球嘅美斯多過佢。趁西甲歇冬，而曼聯喺除夕仲會對米杜士堡，伊巴有機會超越美斯。
