聖誕節撞正星期日，香港一般打工仔都額外獲得多一日假，不過NBA球員就冇咁好，好似上季總冠軍騎士呢啲勁旅咁，更加要喺聖誕背靠背比賽㖭。騎士星期日聖誕大戰險勝勇士一分，周一拆禮物日作客鬥活塞，球隊就安排勒邦占士（LeBron James）休息，冇咗呢位主力前鋒，騎士攻守實力就當然大打折扣。上仗絕殺勇士嘅K艾榮（Kyrie Irving）雖然都貢獻18分八助攻，不過面對火力平均嘅活塞，大部份時間落後下，以90:106大敗，活塞有六名球員得分雙位數，最威係攻入21分嘅第六人T夏里士（Tobias Harris）。
聯盟還KD一個公道
講番騎士聖誕大戰以109:108險勝勇士，聯盟就出番檢視裁判報告，就話比賽最後兩分鐘出現兩次誤判，都係對勇士不利，包括最後3.4秒，勇士前鋒杜蘭特（Kevin Durant）俾騎士前鋒謝菲遜（Richard Jefferson）勾跌，失去絕殺機會，報告就話呢球應該係犯規，不過球證當時冇吹罰，白白令勇士失去贏波機會。