巴西騎師做咗今年聖誕賽期主角，這天跑罷前四場，有蘇兆輝起孖及莫雷拉捧走新馬錦標。雷神見鄉里起孖，自己都唔執輸，於第五場三班草地1200米，以大熱門蔡約翰馬房「喜悅繽紛」輕勝，個人再建一功宣告起孖，此駒拋離亞軍「奮鬥雄心」五又四分三馬位，創出賽駒今季贏最遠紀錄。
4歲馬「喜悅繽紛」今場沿途前置，末段像發狂般大勝，有準一班馬風範，單Win及組合獨贏A1分別派21.5及17.5元，此駒季內5戰3冠1季1殿，演出可靠。
有別於蘇兆輝做冷殺手連爆兩匹冷Win，雷神這天充當大熱保衛者，第三場「巴基之星」1.25倍贏馬，第五場「喜悅繽紛」2.1倍掄元，雷神連贏27次賽事再破香港紀錄，蔡約翰更創出近八年沙田馬場每年最後一次賽事，其中七年有馬贏的佳績。
第五場係三T頭關，賽果正路，次熱「奮鬥雄心」後上跑第二，兩連捷後斷纜，今季首逢敗績，此駒搭「喜悅繽紛」連贏只得3.8倍，全日亦告首度開出大熱Q。今場三、四名分別為冷馬「正是你」及「小魔怪」，四重彩派7,430元。