滬港通、深港通，過去2年先後開通，不過落嚟掃港股嘅表叔就多，北上買A股嘅人就非常少，中銀香港想搞到個場㷫烚烚，舉辦咗「智能投資比賽」，冠軍有1萬元信用卡免找數簽賬額。
究竟呢個比賽嘅「智能」成份有幾高，又「智能」咗去邊度呢？查實呢個比賽唔係第一年搞，不過今年特別邀請咗大專生，用香港應科院提供嘅智能程式炒股，提升金融科技嘅認知喎，中銀亦會喺比賽途中，用各種數據分析、比較參賽者投資表現。
有意向者明年1月可以報名，比賽規則好簡單，參加者會獲分配虛擬港元、人民幣各100萬元，喺模擬平台買賣港股、A股，比賽結束後資產總值最高嘅人，就可以拎到1萬簽賬額，亞軍同季軍分別拎到8,000蚊同5,000蚊，仲有優異獎㖭。