那動人時光，不用常回看？如果係令人毛管戙嗰隻「戙」人時光，係咪更令人回味無窮？回帶睇番新一屆立法會，開鑼兩個月已經有唔少難忘情景，至今仲保留濃濃味道。以下三則2016年議會奇「聞」，肯肯定令人覺得別有一番滋味在心頭。
陸頌雄耐人尋味
立法會特別喺10月初為新人舉行迎新，包括聽議會前輩講吓議事程序等；唔知係咪有超乎凡人學習水平，定係導師講解太悶？工聯會勞工界陸頌雄在席時突然出其不意不停用手擠下顎，八方「有幸」喺遠距離觀看，見佢一時似掹鬚根，一時似唧暗瘡，一輪又搣又唧後，竟然將隻手放喺鼻前……唔少議會中人對呢幕記憶猶新，估唔到佢此奇招「一炮而紅」。
石禮謙搔麻甩味
身痕呢家嘢，一視同仁，唔會因為係立法會議員而豁免，睇睇經民聯石禮謙就知！佢喺本月中開內會期間忽然戙起左腳踩住張枱，人哋摺高衫袖打交，佢捲起褲腳做乜？原來係頴痕，在場嘅記者見到佢悠然自得嘅表情，都感受到佢突然間難題盡解嗰種暢快，麻甩味隔住個mon都聞到。
蔣麗芸爆女人味
如果真心愛一個人，望住佢講嘢應該係好享受嘅，但如果情況相反……向來語出驚人嘅民建聯蔣麗芸，本月中喺教育事務委員會討論TSA時，多次出言為教育局局長吳得掂解圍，插嘴阻礙議員提問，仲要以獅吼功呼喝議員：「你對住我講嘢呀！」熱血公民鄭松泰同民主黨許智峯都招架唔住佢呢股勁爆女人味，網民同聲話好佩服佢老公喎。
李八方
mailto:[email protected]