【本報訊】「人情味，真係深深感受到！」過去半年大埔運頭塘商場的其昌文具被新業主駿昇逼遷，居民發起聯署簽名；老闆羅先生四出為小店奔走，到政總請願，又多次與業主交涉，迫使業主提出可遷往商場其他舖位方案，卻被瘋狂加租近七成，「根本就係玩嘢，等你知難而退」。其昌無力負擔租金，下周結業。離別在即，有街坊花上幾小時用串珠親手製作聖誕樹擺設，小孩則在畫紙寫上心聲，只為向羅先生說一句再見。
記者：譚靜雯
12月的文具店，擠滿買聖誕卡、小禮物的街坊，店外貼上「告別街坊」字句。其昌文具店於運頭塘商場開業25年，去年底才與領展續約3年，加租近三成，至今年4月商場易手，業權由駿昇投資（香港）有限公司以8.1億元奪得，今年7月駿昇突向場內6間小店發律師信，包括其昌，要他們下月遷出。
遷往其他舖加租七成
文具店是羅先生大半生心血，過去半年他四出為小店奔走，到政總請願，又多次與業主就合約交涉，嘗盡甜酸苦辣，「最初收到駿昇嘅律師信叫我哋走，真係瞓唔到覺」。
隨後有居民發起聯署簽名行動，希望其昌能繼續經營，「收到幾千個簽名，好多街坊支持，真係好感動」。連保安局局長黎棟國夫婦都簽名支持，「黎生嚟過幾次，好關心我哋，佢太太都話好可惜」。
一連串行動，最終迫使業主提出小店可遷往商場其他舖位，但魔鬼在細節，新約瘋狂加租近七成，「佢問我哋搬唔搬去商場另一個位，同樣都係600呎，但租金就收4.7萬蚊，連埋管理費、差餉等雜費每個月成5萬蚊，我𠵱家都係交緊3萬蚊」。
羅先生批評業主表面上是回應社會訴求，實情是「玩嘢」，「賣文具邊搵到5萬蚊？都唔係真真正正解決問題，等你知難而退」。駿昇原計劃租予其昌的位置，瞬即由一間家品店進駐。
尚有四成貨未清
努力過後，其昌難逃結業命運，「咁多年啦，始終都係唔捨得」。但最令其最不捨的，始終是街坊的人情味，「人情味……真係深深感受到，我個女都話做咗咁多年，咁多街坊鍾意你都無憾啦，講到我都心酸酸」。聖誕節是零售業旺季，「我都唔太敢入貨，都係入啲聖誕卡，好多熟客都好有心，話嚟幫手清貨，但其實仲有三、四成未清到」。
聖誕前夕，有街坊花上幾小時，用串珠親手製作聖誕樹擺設送給他，「你睇吓整得幾靚，我好開心，個街坊整咗幾個鐘，啲人問我賣唔賣，我話呢嗰係街坊送畀我，唔賣得」。
在邨內長大的安仔和力仔，就坐在店內畫出心聲，羅先生珍而重之掛在當眼處，「佢哋好得意㗎，坐喺到畫咗半個鐘話要送畀我」。
文具店下周四或周五正式結業，除了購物有折扣，周日起文具店更會擺放紀念冊，讓街坊寫下心意。
