青年新政游蕙禎自從被DQ後，一直忙於同政府打官司，次次出嚟見公眾，幾乎都係交代案件進展，佢噚日喺facebook做直播，應節講吓75年前聖誕節發生嘅事，即係二戰時嘅香港保衞戰。
佢特別提到加拿大軍隊嘅貢獻，皆因覺得香港中學教科書好少提到呢場戰爭，英軍、加軍以至華人軍隊有幾多人參戰、幾多人陣亡都好少提，佢話：「永遠到最後都係講1939年12月25日楊慕琦港督宣佈無條件投降。」
香港三年零八個月嘅日佔年代，唔係由1941年開始咩？點解變咗1939年向日軍投降？游BB話香港歷史教育要以港為本，但睇嚟佢都唔太熟史，下次拍片前要check吓資料先！