一講曼谷，大家便想起冬蔭功、芒果糯米飯和一堆炸物，但潮人去旅行又豈止於此？最新網絡上最吸睛的甜點基地，你又知唔知喺邊？今次一於親身到現場，睇睇呢幾間甜品店有乜咁把炮！
一、首間菠蘿專賣店 菠蘿清甜冇渣
Siam Paragon地下新開的甜品區域上月裝修完畢，特地找來藤織設計師Korakot Aromdee設計巨柱，還有室內小運河，順利成章成為打卡熱點。小運河旁第一間，就是全曼谷首間主打菠蘿甜品的「Homsuwan Pina Pina by Tipco」。店內用的菠蘿，都是泰國品牌Homsuwan的本地品種，味道清甜冇渣，連一向怕食菠蘿的記者也覺得好吃。負責人說，連日本也會入口其品牌，很受歡迎。此店主打新式菠蘿甜品，其中一道先煎再配上牛奶雪糕和焦糖的甜品，大玩冰火交融，趁上枱影兩張相就好食，唔係溶晒真係喊都冇人幫到你。
Homsuwan Pina Pina by Tipco
Siam Paragon地下「美食花園」
二、泰式Chill Place 流心奶茶厚多士
除咗菠蘿，泰國另一特產當然是泰式奶茶。Brix Dessert Bar的泰式奶茶厚多士，貌似一磚巨正方體配兩球奶茶雪糕，但切開先知道原來係流心，內有乾坤。同場更有唔少人鍾意的鬆軟pancake，柯打後等大概12分鐘便上桌，小燒鑊裝住的梳乎厘pancake，充滿蛋香仲帶有一點橙皮香氣，都幾清新。
Brix Dessert Bar
Siam Paragon地下「美食花園」
三、全素甜品 低卡慕絲蛋糕
但吃那麼多甜品怕冇quota？呢間就甜品店就適合各位怕有罪惡感的絲打。Veganerie以全素食材料製作，唔只全無麩質，仲用椰奶、豆奶或米漿代替牛奶和忌廉；以豆腐，香蕉和藜麥代替蛋，看似芝士的慕絲蛋糕，其實是腰果蓉，比平常的甜品卡路里足足低了一半！唔少甜品同飲品仲用上亞麻籽同奇亞籽等「super food」，係健康一族之選。
Veganerie
Siam Paragon地下「美食花園」
四、品味生活 實驗室啡有氣凍咖啡
沿路通往附近商場Siam Discovery，上三樓就到一間位於生活百貨樓層的咖啡廳。場內全白磚牆身甚有raw爆實驗室味道，吸引唔少潮人影相。唔只食裝修，呢度甜品和飲品亦有心思，有氣凍咖啡飲落似唔甜汽水，加進香橙的鮮奶咖啡酸酸甜甜，仲有野莓千層蛋糕同條紋朱古力蛋糕，叫人點忍手？
Cafe Now
Siam Discovery 三樓
記者：黃樂雯
攝影：伍慶泉