周二(27日)舉行2016年最後一戰，如果追捧馬房，可揀蔡約翰，事實對上七年每年最後一次沙田賽事，蔡約翰在其中六次有頭馬交出。
蔡廐今期最有頭馬相之馬當然係第八場三班1000米之「翩翩」，上季三歲在港兩戰皆入Q，已肯定早熟質高。果然今季踏入四歲，已三出三捷(其中一仗宣佈無效)。上仗首次升上三班出戰同程直路賽，更可輕勝「夢幻仙子」及「美麗皇牌」兩匹季內識贏之馬，賽績水準甚高，今仗更回配熟手拍檔潘頓操刀，力足保持今季不敗。
第五場三班1200米草地，蔡廐「喜悅繽紛」今季四戰共獲兩冠一季一殿，上仗初上三班要面對「京京千里」、「百勝龍」等惡馬，能夠跑第四已相當不俗，今次對手冇上鋪咁強，有力補中。
其他蔡廐馬方面，第九場「達羅素」在港三戰名次順序三、二、一，可見質高且不斷進步中，今仗升班潘頓造唔到磅，換上雷神實唔會留手，連捷機會高。而第十一場「劍斷浪」仍未打開今季勝門，但拼後特登試過閘並勝出才報名再戰，備戰有誠意，當然要重視。