肥仔K留學日本期間，有一位香港同學，日文比佢更勁，原因係呢位香港同學自細跟父母僑居日本，入讀日本小學，讀日文與日本人一模一樣，全無分別。肥仔K話過：「假若日本人讚你日文講得好，其實真正意思係，哈，你呢個外國人講日語都有七八分準繩；一味同你講而唔會讚半句，佢可能誤會咗你係日本人。」所以佢與同學在東京食拉麵之時，用日語落柯打，夥計會讚肥仔K日語講得好，但從未讚過佢嘅同學。
佢地聽到旺角豉油街附近有一間日本魚生飯店甚有口碑，放假前黃昏前往一試，點知門口排長龍，排咗近五十分鐘先至入到裏面坐低，向周圍一望，最多人（以女生為主）食嘅係240元一碗嘅海膽飯，以當前匯率一算，合3700日圓，不禁伸出條脷。同學話：「在新宿到拉麵店都排隊，有時都要半小時，但每碗拉麵係賣一千日圓啫喎！」肥仔K亦覺得東京青年絕不會為一碗近四千日圓嘅海膽飯而排隊45分鐘以上；用台幣計，呢碗飯值差不多950新台幣，台灣女生點肯制呀。
兩人因而得出初步結論：（一）香港藏富於民，官方嘅家庭中位入息數字並不反映實況；（二）香港年青人，尤其是女生，可能決定咗既然儲蓄供樓首期好難，不如食咗佢。亦因此引伸到香港青年人嘅收入比日本高，比台北更好得多，香港年輕人輕言移民台灣，其實係衝動多於理性。
點解衝動？可能係對梁振英管治嘅一種反動，不過浪漫之餘，諗一諗去咗台灣之後，能夠搵到乜嘢工作去支撐食一碗950元新台幣嘅海膽飯，就要諗清度楚。日本青年亦係搵唔到幾多，過去三年，肥仔K嘅中學同學去日本旅行，不知幾多次，一對夫婦一年去咗幾勻，相反佢嘅日本大學同學冇一個來過香港旅行，在fb話：「暫時負擔不起。」我地在香港常常慨嘆香港青年人難以負擔高樓價，事實亦係，但當年青人不再以為買樓係必需，而甘心與父母同住，留在公屋不搬走嘅話，係有一定消費力（尤其是出外旅行）嘅，依家香港失業率低至3.3%，唔打東家打西家，青年人嘅境況絕非十分陰暗，香港人不宜妄自菲薄。在低通脹低失業率的社會，青年人還是上街示威與警察衝突的話，背後理由多是政治性，執政者的責任最大。