自從4月成立器官捐贈推廣委員會，食衞局局長高永文就頻頻現身器官捐贈活動，噚日Boxing Day假期都去咗維園工展會宣傳。一向受歡迎嘅民望高，完美演繹咩叫做識分身都唔掂，活動仲未開始就俾唔同人捉住影相集郵，直到主持人嗌咪，大家先收手。
以為咁就甩難？活動最後全場大合唱《千個太陽》，成班人上晒台，一人拎住一支假向日葵邊唱邊揈，班太太團越唱越埋，唱完嗰吓索性圍住民望高唔畀佢走，又拎起部手機起勢selfie，影到夠喉先放行畀民望高接受記者訪問。
高局長喺台上話，政府大力宣傳下，器官捐贈冊嘅登記數字近年由10幾萬增至24萬人，但對比全港730萬人口仲係遠遠唔足夠，呼籲更多人登記成為器官捐贈者。