唔少香港人都恨過白色聖誕，若果有機會過白色聖誕嘅話，大家會選擇做乜嘢呢？應該多數都係堆雪人、掟吓雪球或者坐吓雪橇之類啦，不過，今季加盟曼聯嘅瑞典前鋒伊巴謙莫域就親身示範，可以點樣喺雪地上霸氣過聖誕。
扮雪天使玩sit up
伊巴雖然已經35歲，但今季由巴黎聖日耳門加盟曼聯後，依然fit到震。英超並唔係法甲，冇得歇冬，而且仲要喺聖誕開快車，不過，佢仍然搵到時間喺佳節期間鬆一鬆。聖誕節當日，伊巴就上載咗條短片去ig，條片裏面佢淨係着住條底底，瞓喺雪地上面做「雪天使」（snow angel），之後仲做sit up，我求大俠睇到都覺得凍；伊巴今季狀態咁好仲要咁抵得冷，真係點到你唔服！
卻奧斯遊倫敦傳上車
咁又唔係個個球星都好似伊巴咁，用咁激嘅方式過聖誕，好似皇家馬德里嘅德國中場卻奧斯，就趁假期去旅行relax吓。不過，26歲嘅卻奧斯冇返德國探親，亦唔係選擇陽光與海灘嘅地方度假，偏偏走咗去英國嘅倫敦玩，仲要好唔避嫌咁將佢同囝囝喺海德公園玩嘅相，同埋自己喺倫敦著名玩具店Hamleys前留影嘅相上載到ig，所以就惹嚟一月轉會窗重開嗰陣，可能轉投車路士嘅傳聞。有傳媒仲翻佢舊賬，轉載卻奧斯喺2014年嘅訪問，當時佢話如果要轉會英超，就只係會去車路士！卻奧斯話：「對我嚟講，皇馬、拜仁、巴塞同埋車路士，係現時嘅四大球會，如果我要轉會，亦只會揀佢哋。」
至於有可能會同卻奧斯做隊友嘅車路士中場法比加斯，聖誕期間就只係喺倫敦嘅屋企同親友開P，曾一齊喺阿仙奴共事嘅法國中場法米尼就扮成聖誕老人咁出席，仲同法比、仲有佢兩個千金合照。另外，巴塞嘅尼馬就着全套紅色西裝，喺聖誕樹旁留影。