曾為四大天王、楊紫瓊、李連杰、甄子丹等當替身的龍虎武師蔡堅成（B哥）在圈中多年偶有客串幕前，早年在電影《三五成群》演古惑仔神仙B一角，被網民熱捧，更為他開設fb專頁，而新作則是近日無綫播出的新劇《巾幗梟雄III之諜血長天》，他演欲強姦胡杏兒的日本兵。
B哥日前接受本報專訪，欷歔地表示演藝圈不景氣，兩年前已轉型做的士司機，他說：「人情冷暖，世態炎涼，唔係成日都有戲拍㗎嘛，冇戲拍咪揸的士囉！有人搵咪拍囉，冇人搵咪繼續揸的士，勤力啲一千蚊都搵到，但要好勤力囉，都唔係話日日有一千蚊。」多年在影圈打滾，他透露與不少明星都有交情：「好似梁朝偉啦，嗰陣都有約出嚟打波食飯。關禮傑都係好朋友嚟，不過張國榮我就唔敢約。」
提到他的代表作神仙B，要貼印有字紋身造型，他自爆自度加戲掌摑大王宋本中的一幕：「因為我做黑社會，我喺度兇緊佢，我一路兇一路逼前，逼到去佢前面都唔知做乜好，所以咪打佢兩巴囉，當時佢都呆一呆，心諗點解會打我，到cut機之後，導演都問我點解會打佢。」
B哥坦言希望重回演藝圈，更想有機會做導演，他說：「幕前幕後都可以做，不過前提係要尊重，之前我推過一個，佢搵我去做演員，我話要畀劇本我先，但到開拍之前都未有，冇劇本都唔緊要，但你起碼要話畀我知去做啲乜，即使場戲係去到乜都唔使做坐喺度，所以我最後冇去到。」