上周三冬至在養和醫院生下囝囝「雷冬至」的索腿天后陳敏之，昨日於聖誕佳節出院，為免着涼，她穿上大褸及戴着頸巾，由於不想閃光燈閃到BB，所以僅得她一人在醫院門外跟傳媒見面。敏之笑指囝囝有「雷冬至」、「雷公子」和「小雷球」等花名，中、英文名老公仍在研究中，她說：「個個都想佢叫做『雷冬至』，『冬至』都幾得意吖！暫時都冇人撞，亦有朋友話不如叫『Winter Lui』。」升呢人母的敏之揚言開心，她說：「每日都見到佢好得意，做咗媽咪先至覺得好幸福，好開心。」
老公負責掃風
敏之產後餵人奶，發現餵人奶十分辛苦，她說：「谷奶會痛，又會頭痛。不過見到佢就乜事都冇喇，佢真係一個良藥，原來個威力係咁大！𠵱家換尿片都係產房姑娘負責，老公要掃風同埋餵奶樽嘅奶。我未幫阿仔換尿片，𠵱家要按摩，原來有好多學問，因為休息唔夠都會影響奶量。」敏之覺得囝囝似足爸爸，手長腳長則似自己，她並謂：「姑娘話BB食奶食得好瘋狂，好大食，我諗我都要畀多啲心機做嘢搵奶粉錢！」
敏之表示會坐月兩個月，至3月左右才復工拍劇集《溏心風暴3》，現有美容院贊助收身，但相信湊B沒覺瞓定必會瘦，她又計劃再追個女：「𠵱家俾個仔迷住，都擔心第時開工唔知點算，感覺好似失戀咁。」
採訪：黃曉妍
攝影：陳慧安
