聖誕前成班老友一齊飲茶，暢談國際大事與香港特首選舉呢啲大路題目，傾落其實大家都冇乜可靠內幕資料，只係靠估而已，不過在2016年靠估專家會贏，分析專家會輸，都無所謂專家唔專家咯，唔通去年今日有分析專家計算到特朗普可以搬入白宮，以及梁振英搬出禮賓府咩。
老T講到特首選舉，葉劉團隊唔識字，將「吂」當作係「贏」字，認為係今年一個大笑話。葉劉嘅官方答案係：呢個字係一個標誌啫，由年輕設計師設計，弦外之音，係我地班人老土，唔識新時代之設計觀念，不識欣賞。如果係咁講，葉劉嘅設計師未免太過前衞，走在時間之最前線，不知道群眾是否可以跟得上？以時下潮語講，就係太離地，唔認識香港群眾嘅思維。帶領潮流得唔得呀？當然得，但葉劉呢次唔係參加時裝表演，而係參加競選、爭取民望、爭取選委好感噃，班選委嘅平均年齡比香港人平均歲數還要高，啲老嘢點同你講潮流呀？公關大哥P講得好：「係喎，無論個吂字點解，競選一定要許勝不許負，logo上見到個『亡』字就立即要踢走啦；日本人競選時，競選團隊人員扎上頭巾嗌口號，頭巾上寫上『必勝』兩個漢字，以示決心，邊會寫『吂』呀，拆開嚟睇，亡口近乎滅口，壞意頭之至。」
即係話葉劉精通英文，有英國文學碩士學位，其實面對群眾時冇乜用，反而弊在中文根基薄弱，成為笑柄。但我地取笑葉劉「吂」之餘，不妨注意到一個現實，就係如老T觀察到：「我留意到好多幼稚園生返學，由菲傭帶領，人人以英文溝通，兩歲幾小童不分男女已識講sorry，thank you，父母接放學又係同學生講英文。我驚住再下一代更加唔識中文，比葉劉團隊更差噃！」老T果然觀察入微，左丁山在馬會會所見到絕大部份爸媽都係同小孩講英文嘅，子女皆應對如流，細路大個之後，對中文不知仲有無興趣嘞。香港請菲傭照顧小孩十分容易，不少菲傭講英語幾流暢，湊細路最好。其他國籍傭人多數英文麻麻嘅。不過老T有一位朋友曾患中風，要坐輪椅，仔女為佢請咗一位印尼傭工照顧之。呢位朋友今年去世，一個月後竟然有鄰居拍門問呢位朋友嘅太太：「X先生唔喺度，你地會唔會炒個印傭呀？如果係嘅，請通知聲，我家請佢吖？」印傭咁搶手？朋友T去問清楚，原來印傭學廣東話學得唔錯，能與老人溝通，於是香港傭工可分為兩個市場，湊細路搵菲傭，加強英語訓練發音！照顧老人就請印傭，香港人老化對印傭需求有增無減。