《巾幗梟雄III之諜血長天》前晚播到第六集，呢集講到蕭正楠原來未死，又發現胡杏兒又未死等等，但重點當然唔係劇情啦，而係有幾膠同幾重口味。
首先講蕭正楠瞓喺醫院，而隔籬床有位軍人手受傷瞓喺度，但佢手上嘅繃帶就綁得好鬆，受咗傷會唔會咁簡單？加上着住軍服，仲識得偷望蕭正楠，應該真係好輕傷。
鏡頭一轉，蕭正楠就去到杏兒第一次被強姦嘅地方，蕭正楠就咁啱望到一條染血嘅巾，為咗推進劇情，蕭正楠一睇就知係杏兒嘅血，爬咗上去之後，就發現代表杏兒嘅織草蜢，之後就開始回憶杏兒被姦嘅畫面，點解見血會諗到強姦？
劇情再推進就講蕭正楠要成為國家間碟，受訓期間，要戴住一個「臉堅尼」，仲收到命令唔可以除落嚟，長官俾咗個新名佢叫「甲乙丙」，其實編劇可唔可以畀少少心機，諗一個冇咁求其嘅名？不過都有好笑嘅彩蛋位，就係受訓期間，蕭正楠要半裸戴住「臉堅尼」，當時一身肥肉嘅佢，都幾好笑。，但有可能嗰個係替身……
時間再次推進，蕭正楠已經迷姦咗陳自瑤，混入咗黑幫嘅家族，咁啱就撞到胡杏兒，之後偷聽嘅情節就出現喇，首先係蕭正楠喺杏兒嘅神主牌嘅面前講咗好多嘢(自言自語)，杏兒就喺後面偷聽，蕭正楠講完就開車走，走到一半無啦啦返轉頭，冇錯！係唔知點解會返轉頭，咁就見到杏兒喺自己嘅神主牌嘅面前講咗好多嘢(都係自言自語)，今次輪到蕭正楠偷聽，喺短短十分鐘嘅劇情入面，偷聽咗兩次，所以話其實《巾幗III》，當笑片睇，其實幾好笑。