袁偉豪、李佳芯同黃芷晴前晚喺屯門出席聖誕倒數活動，袁偉豪舊愛岑杏賢曾話過已經唔只一次畀機會佢，唔知袁偉豪得到幾多次機會呢？不過佢唔願講：「我冇嘢講，再回應就好煩，再回應冇意思，大家都明白做好朋友。」會唔會追番杏賢？佢話：「Never say never.（永不說不）」
開餐冇心機
情場失意，袁偉豪話要專心事業，但都會諗吓感情，講到呢度就話好熱要抹汗，仲除埋煲呔。分手要搬離愛巢，仲喺附近搵屋，佢話：「因為近返工，可以喺最短時間搬屋，有啲乜嘢事都有個照應，搬得遠就冇乜時間。」杏賢𠵱家一個人住，係唔係可以照顧吓對方？佢強調：「佢有屋企人照顧，我係照應。」另外，袁偉豪出席活動前同經理人去咗又一城食晚飯，之後又去食蛋糕，全程頭耷耷冇心機，化悲憤為食量。
撰文：馮仁昭