放假有咩做？係咪又想去嘉年華？咪住先，中過咁多次伏，不如停一停，諗一諗，考慮清楚先好行動呀。
友邦歐陸嘉年華：
14年重臨香港嘅嘉年華，連續兩年嘅開幕日都拎唔到牌，部份機動遊戲唔可以開放。上年有掟銀高手連贏30隻巨型公仔，令到大會臨時「搬龍門」，唔俾玩家喺同一個攤位拎大獎。
荔園Super Summer：
唔係以前集體回憶嗰個荔園，而係上年重新開幕嘅荔園Super Summer，不過作為招徠嗰間恐龍屋，由以往驚嚇變咗膠恐龍，又無理頭轉做瀡滑梯，更有人投訴小朋友玩呢條滑梯擦損面。
荔園今年移師博覽館就多咗電動高卡車，45分鐘盛惠$280，不過上堂、登記同着裝備用咗極大部份時間，真正落場時間得8分鐘，玩完都唔知做過乜。
Slide the City Hong Kong：
前年首次降臨香港被點名狂數，包括招牌滑水梯排3個鐘都未必玩到，條滑梯唔夠水、斜坡又太短，瀡唔到去尾，好容易同其他玩家攬炒撞傷。最大鑊係有部份電線浸水，隨時會有漏電風險。
今年8月再次挑戰，不過一瀡斷尾呢個問題仍然冇解決，開幕日朝早仲拎唔到臨時公眾娛樂場所牌照，令早場客齋等冇得玩。
中環海濱摩天輪：
呢幾年成為咗香港地標，電影定電視劇都老是常出現，不過原來開幕當衫遇到阻滯，由預計14年9月初開幕，不過因為施工進度落後、政府發牌又要延遲，結果去到12月先開幕，VIP車廂仲要搞到夜晚先有得坐。