普天同慶賀聖誕，《今天應該很高興》！達明一派將於明年假紅館開騷紀念入行三十一周年，主辦單位環球唱片用了三個月時間，竟未能為達明騷搵到一個贊助，對於達明騷疑被趕絕零贊助，明哥不畏不懼說：「我對於做正確嘅事立場，係一定唔會改變！」
由黃耀明和劉以達組成的達明一派，經歷多次解散和重組，將於明年3月合體假紅館舉行三場「達明卅一派對」，然而，縱橫樂壇逾三十年的達明，據知開騷竟然搵不到任何贊助，沒主題贊助、沒大會贊助、沒指定銀行優先訂飛，環球曾跟銀行、保險、酒類、汽車等品牌斟洽，對方卻諸多推搪說：「涉及少少政治敏感」、「公司都好鍾意達明，但原因其實大家都明。」
無悔參加傘運
雖然花三個月依然零贊助，但環球沒放棄達明擲八位數字製作費搞騷，明哥日前接受電話訪問時坦言：「其實冇乜感受，因為一早預咗，我哋已經搵到最大贊助，就係我哋唱片公司，唱片公司支持重要過任何贊助。」
問到沒贊助是否跟撐雨傘運動有關？明哥無奈說：「我梗係希望同雨傘運動冇關係，我梗係希望佢只係覺得我哋唔受歡迎，所以唔贊助我哋！至於你問我立場有冇改變，我對於做正確嘅事立場，係一定唔會改變，我係冇後悔參加過雨傘運動。」問到會否覺得被趕絕？明哥說：「我哋𠵱家仲可以繼續唱繼續錄音，係未被趕絕嘅，都唔希望見到有呢一日，我哋如果大家都企硬，堅持有玩音樂同創作自由，我哋係唔會被趕絕。」
「擔心下一代」
明哥希望企業不贊助敢言藝人，不會變成常態：「如果係嘅話，我會覺得幾可悲！因為佢哋嘗試用經濟手段，打壓創作同言論自由，我唔希望香港變成一個被禁聲嘅地方。我唔係好擔心自己後路，我都幾十歲人，有自己方法繼續行落去同生存落去，其實我係擔心下一代，我哋留乜嘢世界畀下一代係重要嘅，我哋令到下一代好害怕發聲表達自己，呢個先係我擔心，希望大家一齊攜手，唔好令大家活喺一個懼怕嘅社會。」
另外，網友亦紛提議搞眾籌，明哥回應說：「我都曾經諗過眾籌，不過環球一力承擔主辦單位責任，我哋就冇諗眾籌啦，如果冇大嘅唱片公司支持，我哋都睇到何韻詩證明咗，其實我哋可以自己養自己香港歌手。」
採訪：皓騫