香港導盲犬服務中心致力繁殖同訓練港產導盲犬，希望令更多視障人士搵到個伴。原來導盲幼犬通常會喺7周大就入住寄養家庭，熟習人類生活模式。今年3月出世嘅拉布拉多雌犬Apple，喺5月入住黃家接受基礎訓練，黃太接受政府新聞網訪問時分享教狗心得，佢話寵物犬可以放任佢哋做乜都得，但導盲犬就要學習嚴守指令，例如要喺指定地點大小便。
黃太每日帶Apple外出兩、三次，要行商場或者搭公共交通工具，等狗仔四處行適應唔同環境，仲要去酒樓食肆，有助訓練佢哋保持鎮定同應變能力。
黃太話Apple寄住黃家，除咗帶嚟歡樂，仲令囝囝多咗份責任感，喺屋企會陪Apple玩，幫父母分擔。