左邊定右邊係基斯坦奴朗拿度（C朗）呢？答案係兩個都係。西甲歇冬，C朗返咗葡萄牙鄉下馬德拉島過節，順便巡視吓間博物館，仲走去同自己嘅蠟像自拍，右邊望鏡頭嗰個先係真人。C朗將張相放上網，同球迷講聖誕快樂，唔夠半日吸到近200萬個like！佢話：「聖誕節嘞，我係咪唯一一個有思鄉病嘅人？好開心可以返馬德拉島放幾日假。」