呢一年嘅聖誕節，梁振英可能特別感觸良多，由本來爭取喺述職期間獲欽點再爭下屆特首，到上京前突然俾中央DQ連入閘機會都冇埋，最後獲領導人「高度讚揚」體面下台，可謂一下子由天堂跌入地獄。外界關注2017年梁振英卸任特首後有乜好搞？除咗力爭全國政協副主席，八方憑佢今年言行，覺得佢有潛力進軍3個行業，話唔定繼續用過人毅力，另創一片新天地。
洗板生招牌 專洗黑材料
「知唔知咩叫洗版？」八方相信大部份有上網嘅人都會知道乜叫洗版，雖則facebook嬲嬲豬多過乜，但都算網絡紅人啦，所以當CY喺年初施政報告傳媒論壇中被問到知唔知乜係洗版，佢都好有信心咁話「G」，但G完之後就無言以對……呢一幕深入民心，據知有政界花生友質疑佢係咪以為講緊那些年攞嚟洗衫嘅洗衫板？既然係咁，八方建議佢轉行成為洗板生招牌，口號都幫佢諗埋：黑材料都洗得甩，唔做特首未必係損失，話唔定幫襯者眾喎！
CY今年另一令人津津樂道之舉，係話中環可以設泳棚，建議打工仔午飯後抽啲時間去游水。如果實行到就真係超離地創舉，皆因唔少打工仔話食飯都唔夠時間，何來抽空去游水？而且飯後做劇烈運動會胃抽筋，梁特竟然咁天真？面對咁多反對聲音，以CY嘅性格，一定覺得係世界嘅錯而唔係佢嘅錯，如此情況可以考慮教游水，致力培訓喺短時間內以超常人速度游水又唔會抽筋嘅健將，證明佢好有先見之明。
最後嘅發展方向，當然要講番CY嘅強項，調理農務幾乎係佢嘅標誌，9月佢講到搵地難時，仲哽咽話粒粒皆辛苦，似乎深明一分耕耘一分收穫，但佢今年炮打港獨迎合阿爺都係最終得個桔，可能要歸園田居專心耕作，由政途體會到嘅北方核心式栽培兼折枝法，若果應用喺務農，話唔定有更大收穫。至於網民覺得佢做乜好？喺呢方面幾乎冇分歧，話CY大可以去做監躉喎！
識睇睇留言
懵董伯伯：無講過即係唔存在，我冇講過讓位畀你做政協副主席
BEAR BEAR熊：人在旅途灑淚時，仲唔係時候嚟赤柱陪我？
女CY 2.0：官到無特首膽自大，做IC幫特首擋箭！
葡萄成熟儀：你連自己個位都捍衞唔到，做乜都冇用啦
痔瘡膏發言人：三個字，不予置評。
I'm just齊蔭：一家人可以去食龍蝦咯
MR.Pringles：去食薯片，飲咖啡，睇法國電影……
資料來源：各人肚裏面嗰條蟲
李八方
mailto:[email protected]