2016年網絡世界遍地花生殼。本意係推廣讓座文化嘅關愛座，慢慢變成「批鬥座」咁，好多人都有位冇得坐，驚坐低咗就會被網絡公審。有人萬聖節變身真人版關愛座，話要巡視關愛座使用情況；當然唔少得改歌同改圖。
為你做足一百分嘅大家樂，今年重金禮聘子華神拍廣告賣溫情，力sell「快樂第一」。但網上吸盡負皮，事關有大家樂員工爆料話要踩16個鐘嘅地獄更表，網民批評大家樂寧願大手筆請男神拍廣告都唔善待員工。
今年攪珠出現過一次神奇六合彩，頭獎23.5注中，每注派二百多萬元。但網民重點放咗喺攪出號碼，1至10當中淨係冇5、6、8、9。網民話係天機，暗示「唔要689」，冇耐梁振英真係宣佈唔連任。
但更靈嘅應該係燒山蕭若元，今年網民封佢做燈神。戰績包括燈死希拉莉、梁天琦，就連英國脫歐公投都燈得死，燈神「美譽」點都走唔甩。
今年網絡仲有咩大事？即刻睇片！