今時今日，收到手寫嘅聖誕卡，真係份外窩心動人。公民黨油尖旺區議員余德寶今個星期就喺辦事處密密寫卡，大大話話寫咗逾百張，連自己都笑稱有啲似「罰抄」。呢位公民黨小鮮肉話呀，原來早前有街坊寫咗聖誕卡畀佢，多謝佢幫手處理個案，佢收到後好開心，覺得係同街坊溝通嘅好方法，所以買咗百幾張卡，有街坊來訪時會寫一張畀佢哋。
佢話呢個星期keep住有小朋友去佢office，所以好多都係寫畀小朋友。會寫啲乜嘢祝福語？佢話小朋友通常想要「玩多啲」，「可以玩陀螺」（無錯，係陀螺，因為余德寶搞過陀螺大賽）。至於寫畀家長嘅卡，通常會祝佢哋嘅小朋友學業進步、聽聽話話；佢笑稱有啲家長見佢密密寫卡畀小朋友，讚25歲嘅佢好有「父愛」喎！