立法會前主席曾鈺成舊年聖誕節應ViuTV邀請，同長毛去波蘭做義工，其間扮鹿同聖誕老人及𠱁細路；「扮」過翻尋味，曾鈺成喺facebook祝大家聖誕快樂時，都將自己「加料」戴住頂鹿角嘅聖誕帽。
諗緊送乜畀長毛
而曾鈺成噚日同黨友行工展會時就透露，離開立法會後無再見過長毛，但長毛最近已約咗佢，將會進行「波蘭周年紀念」飯敍！
阿曾就話𠵱家度緊飯敍地點，以及諗緊送乜書畀長毛做聖誕禮物，「因為佢送過好多書畀我」。
而曾鈺成行工展會時，獲唔少市民索取合照，阿曾用咗200幾元幫襯社企買咗工藝品，亦食咗芝麻缽仔糕。
而陪阿曾shopping嘅「梁粉」劉國勳就喺阿曾食缽仔糕時同阿曾講：「食完就步步高升嘞！」周浩鼎就用近千元掃貨，包括買咗紙巾盒送畀老婆。