有新民黨主席葉劉淑儀參加嘅選戰，真係笑料處處，皆因佢獨特嘅思維模式兼坦率嘅說話態度，往往娛樂無窮！政府花生友就瘋傳緊葉劉接受《now新聞台》訪問嘅一席話，佢回應民望喺其他跑馬仔候選人中長期沉底時，講到特首梁振英唔爭取連任，令到佢同埋曾經被佢形容為妹妹嘅政務司司長林鄭月娥都成為市民洩憤「箭靶」，似乎好不滿受689拖累咁喎！
葉劉雖然喺早前已經宣佈參選特首，但民望未見大幅飆升，相反都係喺低位徘徊。葉劉回應《now新聞台》委託嶺大嘅特首民調時就提及，梁振英放棄爭取連任，令佢同林鄭成為市民宣洩不滿嘅箭靶，但佢話都係意料之內：「梁生一宣佈唔選嘞，我覺得網上瘋狂鬧我啦，咁到阿林太表示不得不再考慮（參選），我發覺網上又多咗好多人鬧佢啦，『女版689』呀、『A B Carrie』呀……因為始終我哋3個都係建制吖嘛，嗄，冇咗建制排第一嘅梁生，其餘嗰啲都會做箭靶」。
對入閘信心十足
有人聽完葉劉咁講，質疑財政司司長曾俊華唔係建制派咩？點解佢民望又咁高吖？八方唔知葉劉點定義建制派，可能覺得對方同民主派較親近而作此區分啩！而退休法官胡國興冇被葉劉歸類為建制派，就唔令人意外嘅！
葉劉同時話喎，可能佢喺政綱度提到為《基本法》23條立法嘅問題，「我冇迴避」，令市民都對佢做特首增加憂慮，但佢強調，如果單憑受歡迎程度而決定係咪從政，係欠缺承擔，相信民調結果只係暫時性，仲話宣佈參選後支持度明顯上升，對爭取150個選委提名爭取入閘依然信心十足！
李八方
mailto:[email protected]