八方前日都寫過，發展局邀請立法會發展事務委員會成員喺明年2月19至20日去內地考察東江水，一批無證議員包括香港眾志羅冠聰（圖）都話，暫時唔會申請回鄉證。
聰聰噚日喺電台再解釋，話2014年雨傘運動時上京，結果被註銷回鄉證，若然佢嘅主張係唔可以帶返內地，覺得暫時係無申請回鄉證嘅必要。唔想同中央溝通咩？佢話同內地溝通有好多方式，唔一定要返內地，若果中央希望修補關係，應該先撤8.31框架，「假如大陸都係咁專制……見唔到有需要返去」。
同屬自決派嘅新西票王朱凱廸，呢次可能要同聰聰分道揚鑣，話明會去內地觀察東江水，因為東江水同港人關心嘅食水問題有關，「想親身睇廣東省裏面嘅環境問題」。民主黨就有黃碧雲參與東江水考察。