香港動植物公園最新有兩名新成員，就係不時喺動畫同大銀幕出現嘅動物「狐獴」Meerkat。
呢兩隻雌性狐獴分別四歲同五歲大，已經入住園內新設嘅「狐獴之家」。
身體修長，長有銀棕色軟毛、尾巴末端則深色嘅狐獴喜愛群居，一般生活喺乾旱空曠平原上。
佢哋係肉食性動物，以昆蟲為主要食糧，啲爪強而有力，最啱挖掘地洞。
原來當狐獴族群中有成員外出覓食時，其他成員會守住洞穴做「哨兵」，防止鷹、鵰等猛禽襲擊，認真有團隊精神！
放哨時嘅姿態仲好特別，就係以後腿站立，遇有危險，「哨兵」會尖叫提醒同伴搵地方匿。聖誕有時間不妨去探吓呢對新動物明星。