【三個粉絲追韓劇】各位韓劇迷最近都忙住煲《孤單又燦爛的神－鬼怪》，除咗睇孔劉同李棟旭搞笑鬥氣，唔少人都問究竟孔劉飾演嘅鬼怪係神定係鬼呢？
도깨비(鬼怪)係韓國傳統故事嘅角色，連童話書都有談及，形象唔算恐怖，當中亦分好多類，例如巨人怪、火怪、風怪、海怪、半神半妖等，而孔劉應該屬於物件怪，因為佢依附住一把劍。
普遍韓國人認為物件怪都係依附喺掃帚，韓女Jung Joo Eun就話嫲嫲曾經同佢講過鬼怪嘅故事，「行山嗰時覺得好似有人摸你，當佢第二次摸你嘅時候，你一手捉住佢，一睇就發現原來係掃帚，係鬼怪入咗掃帚，整蠱人類。」鬼怪喺韓國人心目中有好、有唔好，有啲識妖術，會貪玩整蠱人類，有啲就有神力，人類會向佢哋許願。劇中孔劉就擁有神力，會聽到人類向佢誠心許願，未必幫手，不過佢一時心軟，救咗恩倬同佢媽媽一命。
劇中地獄使者李棟旭唱咗首關於鬼怪嘅童謠，笑鬼怪從來唔洗底褲，所以底褲污糟有陣味，激到孔劉紮紮跳。呢首童謠非常出名，連宋一國嘅可愛三胞始之一萬歲都唱過。韓國民間對鬼怪有唔少傳聞，而佢哋竟然有個都市傳聞同香港有關。
在街頭訪問中，韓男Kim Ma Young講開鬼怪同鬼故事，就記返起細個聽過人講，「細路喊嘅時候，大人就會話，『如果再喊，홍콩할매(香港婆婆)會嚟捉你！』」韓女Kim Ji Sun就話只係睇戲睇過有「香港婆婆」，形象恐怖，個樣係半人半貓！「香港婆婆」嘅傳聞發生喺80年代，話有個韓國婆婆坐飛機飛香港途中，遇空難身亡，因為當時佢帶咗愛貓上機，死後就變成半人半貓嘅鬼。有傳「香港婆婆」可以10秒跑100米，喺韓國專捉走細路，甚至喺學校廁所殺學生。
咁誇張嘅傳聞都有人信？的確，當年連媒體都大肆報道！原來因為當時發生連環子女綁架同販賣人口案，搞到家長人心惶惶，傾向相信傳聞。事實上，當年根本無空難，亦唔輕易帶寵物上機。至於點解韓國人嘅都市傳聞會同香港有關？可能因為當時流行睇港產片，韓國人鍾意睇《倩女幽魂》呢類鬼片，所以鬼故都同香港有關。睇韓國嘅綜藝節目，主持有時都會提到「香港婆婆」，好似劉在石曾經喺《無限挑戰》取笑過朴明秀似「香港婆婆」。
主持：動主播阿仙、viu韓劇導賞員Ruby
記者及繙譯：卓惠媛(Joyce)
攝影：陳家文、李錦鏵
《鬼怪》片段由Viu提供：
https://goo.gl/nVkiGe
【三個粉絲追韓劇】
http://hk.apple.nextmedia.com/enews/animation/kfans/