臨近收爐，以為office好靜個個等收工？非也，除咗keyboard嘅噠噠聲，氣氛仲相當之緊張，唔講仲以為公司有客申請破產，進入panic狀態中。
「喂，Connie你揀好未㗎？我噚日睇中嗰對鞋已經冇咗囉。」
「痴線頭先呢個袋明明仲有白色㗎！點解得返粉紅色㗎？」
「喂，我check out先喇，冇貨喇，個promotion code係咩話？」
呢度唔係名店開倉，呢度係office。無他嘅，Thanksgiving後聖誕前，係外國（尤其是消費大國美國）嘅名店SALE重災區。一線名牌梗係睬你都儍，但平價啲、例如喺樓下太古廣場都有嘅Kate Spade，幾乎日日都跳樓式大減價，二五折、折上折，乜都有，識買一定上網買。好彩阿姐前日已經飛返加拿大度假，我哋先可以咁旁若無人咁執平貨。
「家姐我個friend想要呢個長銀包呀！」Connie一個電話隊埋嚟，係Kate Spade最多花款嘅長銀包，雖然係細少少，但我就係貪佢可以放落啲細袋仔度，寧願另外再買個card holder裝啲會員卡。
呢個銀包目測門巿買無千二都要八百，我喺search bar click一click，賣七十蚊美金再七折，計番四百蚊港紙都唔使，平過半價。
繼上個星期PRADA官網50% off同埋上星期Tory Burch大減價之餘仲要免運費之後，香港OL嘅購買能力仍然驚人。我諗寒冬只存在於實體店中。喂，大佬，我要用腳行入門巿，仲要貴過上網買成倍有多，咁係咩玩法先？
講起我就扯火，都仲未計就嚟遷出中環嘅A&F，嗰時有晒裸模係威係勢，入到去件件衫都三、四百蚊，難得有SALE先平少少。偏偏佢網上長期Clearance，仲要再額外四折六折，買件top其實一百蚊都唔使，買條jeans都係二百零三百咋陰功！
「家姐我揀好晒個囡啲衫啦，你個美國朋友地址係乜嘢話？」今次Priscilla都加入戰團，因為折嘅唔止係名牌，仲有港媽買極都唔厭嘅衫仔。港女就係Kate Spade、Tory Burch，少女就係A&F，港媽就當然係Carter's。我一望，哇，嚇死人咩買成十幾廿件！「五蚊美金一件咋！我買廿件都冇你哋買個袋咁貴囉！」
所以真係唔好話年尾收爐好舒服云云，其實真係分分鐘貼錢返工㗎（誤）。
【家姐教路】喺外國網站網購難度分三種，第一種係可以直接access而又接受香港信用卡；第二種係睇到啲product，但係唔收香港信用卡，好似買糖嘅Sugarfina；第三種係detect到伺服器proxy，要特別用App先至上到美國版網頁嘅A&F，而且A&F嚴在偵測到集運倉庫嘅地址，要買就要託美國或加拿大朋友代寄，或者直接搵代購。計埋呢啲成本，平過香港門巿就可以GO！
關家姐
