新民黨副主席田北辰未來就唔知使唔使為選特首嘅葉劉淑儀助選「做牛做馬」，但就喺啱啱過去嘅周末，連鹿同樹都做埋。
田二少當日化身成「聖誕樹x聖誕鹿」，去到佢主場新界西，同街坊合照兼整立體聖誕卡，仲參加咗個聖誕嘉年華作為表演嘉賓。田二少本來準備咗魔術表演，諗住畀啲驚喜一班小朋友，點知過程頻頻「蝦碌」，表演臨結束前，先同觀眾自爆：「我發覺我漏咗一個步驟！」
當小朋友試圖揭穿田二少點變魔術時，田二少又同小朋友講：「你哋估唔到我點做㗎嘞，我隻手好快㗎」，場面相當搞笑。田二少事後亦自我感覺良好，話今次無辜負「新西米高高柏飛之名」喎！