快活谷這晚舉行2016年最後一次夜賽，甫開場第一場四班一哩即爆冷，由郭能策騎、蘇保羅訓練的半冷門「明月光」沿途居中後位置，直路後上一攻而破贏短馬頭位，四歲愛爾蘭自購馬第12次在港出賽首度取勝，單Win及組合獨贏A2分別派86及39元。
「明月光」馬主包大偉養馬多年，名下出過唔少名駒，例如兩屆新加坡新航國際盃（已停辦）冠軍「花月春風」，2010年女皇銀禧紀念盃盟主「鳥語花香」等。今季養馬運轉弱，名下馬一路捱打冇贏過，這晚在2016年夜馬賽期完結前夕，佢及時轉運食頭糊，取得個人今季第一Win，可謂一天都光晒！只可惜包大偉沒有入場，剛從新加坡回港的蘇保羅指出「明月光」表現穩定，陣上不時有接近演出，以往三班亦上過名，如今在四班評分有利，希望繼續有好表現。
「明月光」成為郭能與蘇保羅季內首匹合作頭馬，兩人同時連續第二次賽事贏馬，大家都係旺開有條路。今場亞軍由冷馬「強中堅」夥拍楊明綸後上拎到，季軍為大熱門「招多福」，殿軍係大冷門「愛寶」，四重彩派15萬幾。