中文大學一個民意調查顯示，四位可能競選特首人士之中，曾俊華民望最高，有32.6%支持率，林鄭月娥民望急升達23.8%，完全吸收晒退選嘅梁振英支持率及曾鈺成部份民望，升到第二名，葉劉、胡官及曾鈺成三人就落後甚多，對前兩名未有威脅。
林鄭上京過聖誕，應有「私人」活動，聽高人指點之類事情，而曾俊華嘅辭職遲遲未批，唔通要等到林鄭宣佈辭職獲准後先至有下文？睇嚟林鄭可以得到全部梁粉嘅支持，繼續推行梁振英路線，如果林鄭成功，未來五年香港政治會係新瓶舊酒。如此一來，死硬支持梁特嘅會轉投林鄭，當初反對梁特嘅建制派（特別係商界）就未必肯跟大隊，乜唔係啫，林鄭讀社會學出身，自言最鍾意嘅一份工係做社會福利署署長，要推動撤銷強積金對沖（中小企及廠商會會員之最痛），加強扶貧派糖，成個工聯會代言人咁款。香港總商會、工業總會班選委如果肯支持佢，一定係劉延東之流在後面扭手臂，如果中央唔阻撓曾俊華入閘嘅話，建制派867票之中，商界票一定會投曾俊華，工會、漁農界、中華總商會、中華出口商會等中央鐵票會聽命支持林鄭，於是兩個人都唔夠票，邊一位要上台，都要得到若干泛民選委（專業界選委）支持。
葉劉與胡官入唔入到閘，仲係未知數，胡官係大冷馬，暫時可以唔理住。葉劉呢，係民意支持不足，商界支持不足，建制派觀望緊，難怪佢嘅宣佈競選大會冷清清，自嘆世態炎涼。但葉劉團隊啲中文水平不足，一個「吂」字成為全城笑柄，影響形象，係佢自己攞嚟嘅，之後葉劉接受訪問，批評曾俊華讀經濟少過佢，令人覺得佢大言不慚，葉劉講「積極不干預」嘅經濟思維落後，係佢去完史丹福讀碩士返港之後就不停講嘅，十年來不斷講工業政策，政府推動策略行業發展等等。呢類理論亦係陳年古典，並不新鮮，日本算係戰後第一個亞洲國家實行嘅，由1950至1980年代三十餘年，十分成功，之後經濟爆破，1989至今27年，經濟一籌莫展，昔日光芒四射嘅企業如新力、東芝、聲寶已俾韓國打低。韓國嘅工業政策更厲害，政府積極扶持之下，大財閥壟斷，貪污勾結不絕，睇吓朴槿惠「閨密門」就知道一二。香港要在21世紀之智識型經濟體系實行政府干預，施行工業政策，比「積極不干預」更加落後於時勢。葉劉讀經濟比曾俊華讀得多喎，因住讀到誤入歧途呀！