贏馬機器冇咁易失靈，雷神莫雷拉這晚於快活谷前四場輸晒只得三場位置，但下半場一開，佢馬上以好拍檔沈集成馬房的「超強快駒」爆半冷勝出第五場四班一哩，雷神將個人長勝的香港紀錄，擴展至連贏26個本港賽日未斷纜，至於「超強快駒」順利連捷，單Win及組合獨贏A2分別派66及27.5元。
四歲馬「超強快駒」冇改錯名，夥拍雷神出賽威力超強，今場沿途在中後位置，臨尾追上贏四分三馬位，人馬累積合作七戰兩冠一亞兩季兩第五不失獎金，馬兒累積十戰谷草亦入晒前五名，數字好突出。雷神同沈集成近兩次攜手贏馬，都是在谷草C加3跑道四班一哩贏「超強快駒」，真係無巧不成話。
沈集成身在日本沒有入場督戰，「超強快駒」馬主之一陳永隆表示十分開心，因為上場馬兒取勝時，他在英國公幹，錯過拉頭馬機會，今場愛駒負重磅，原本都有點擔心，不過在亮相圈見到莫雷拉太太、太太的姊妹、以及雷神外母特意撐場，即充滿信心。
莫艾誠第四場贏「星際武士」，但第五場功虧一簣，新座騎「開心健康」力拼做阿二，不敵「超強快駒」，令誠仔唔可以初嘗在港起孖滋味。三、四名則由新勝馬「旅遊大使」及大熱門「騂龍」順序瓜分，四重彩派7,902元。