港鐵噚日下午喺青衣站安排協青社嘻哈學校嘅舞蹈隊表演聖誕街舞，一向瞓身嘅主席馬時亨期間仲粉墨登場，扮成聖誕老人出現，喺車務營運總監劉天成同公司事務總監蘇家碧陪同下，向在場乘客派發聖誕朱古力，等大家過一個甜甜蜜蜜聖誕節。
肥馬話呀，港鐵會喺聖誕期間舉辦不同推廣活動，同乘客分享節日喜悅，例如未來幾日唔少港鐵車站都會有報佳音表演，聖誕老人更會喺聖誕節當日於不同港鐵車站現身，畀個surprise大家兼派小禮物㖭呀！
南港島綫本月28日開通，劉天成話當日係學校假期，人流相對較少，但港鐵會增加人手，密切留意月台情況，預計南港島綫開通後，黃昏繁忙時間嘅金鐘站人流會增加，為令服務運作安全及暢順，有需要控制人流，例如關閉部份扶手電梯。