記得上年摩連奴喺車路士食完個聖誕晚宴就被炒，好似最後晚餐咁，但今年就唔使驚嘞，可以食番餐安樂茶飯。摩佬老婆放咗張相上網，係摩佬同法利亞等助教喺周三晚嘅合照，一齊食番個聖誕大餐，提早過節。
最近有傳曼聯已經諗住同摩佬續約，呢位53歲葡萄牙名帥就話冇依回事，「佢哋未畀新約，但佢哋好支持我，令我覺得做三年都唔夠，好想長做落去。如果佢哋有日畀新約我，我就會簽名。」被問到會唔會去中超賺人仔，摩佬話：「我鍾意喺高水平嘅聯賽執教，同埋我仲後生，我諗過多好多年後先會去中國教波。」
另外，一班曼聯球員禮拜三去醫院派聖誕禮物，同病童見面。伊巴謙莫域、保羅普巴等都有去到，伊巴仲抱起啲小朋友同佢哋玩。