練馬師李易達因曾經兩季頭馬不達標，故目前每季從練均要打護級戰，一場頭馬都不能少，事關一旦再出現單季贏唔夠數，佢就會步胡森同孫達志後塵，被馬會收回牌照，唔可以繼續做練馬師。
所謂粒粒皆辛苦，李易達這晚開場前已個半月冇贏馬。好彩潘頓幫到手，第二場五班谷草一哩，潘頓騎李易達馬房「越駿寶」初落五班孭133磅，全程交足功課，將呢匹新座騎留放恰到好處，直路沿內欄一步不蝕上前，呢匹落飛馬就此以輕鬆贏個半馬位齋，為李易達帶來今季第四捷，由賽前排練馬師榜尾二，升至尾四，最差三人是吳定強、告達理及高伯新(包尾)，令李易達名義上都叫做向16Win畢業行前一步。
「越駿寶」乃六歲新西蘭自購馬，之前在港14戰零上名零獎金，呢次一換潘頓跑番谷草一哩，在港首度入三甲即贏，人馬初次合作即時擦出火花。
今場二至四名順序為「吉利高」、「歐洲之星」及「通勝」，四重彩同頭場一樣都係派15萬幾，這晚谷草可謂爆開有條路。當中「吉利高」排位前補替原正選馬同屬霍利時麾下的「超甜橙」，結果「吉利高」以九歲之齡後上跑第二，鞍上人郭能繼頭場勝出「明月光」後，再入連贏位。