聖誕新年，好多人計劃外遊鬆一鬆，財經事務及庫務局局長陳家強今年就冇呢支歌唱，事關鬍鬚曾上星期辭職，陳家強做咗署理財爺，一人做兩份，負責晒財政預算案，佢只可以同普通打工仔一樣，放多兩日紅假，兼留港消費。
新一份財政預算案將於明年2月底宣讀，財爺以往由12月開始要會見各界，聽取政黨意見，睇數據，再寫預算案，所以呢幾個月陳家強有排忙，放假都要埋頭苦幹，好在佢以往做開庫務嗰部份，知道乜頭乜路，好易上手。
至於2月係咪由佢上立法會宣讀預算案，聽講佢都等緊消息，皆因市場有傳聞指，有人有意安排發展局局長陳茂波做財爺，唯有拭目以待喇。