坊間不時都話，長和系主席李嘉誠下屆特首戰，會撐財政司司長曾俊華，但相信地產商見過鬼都怕黑，今次選戰唔會咁早落注，以免好似上回力撐唐唐但大熱倒灶就好蝕。而喺熱傳撐鬍鬚曾之際，有人則話其實超人同鬍鬚曾其實唔係咁friend，鬍鬚曾甚至向超人潑過冷水喎！
「香港唔會返轉頭做膠花」
八方翻睇資料，確實發現2003年9月底，誠哥當面向時任國家主席胡錦濤，建議喺深圳同香港之間設立免稅工業特區，以創造就業機會，但特區政府一直冇回應，當時擔任工商及科技局局長嘅鬍鬚曾，首度開腔即列舉四大理由話有關建議不合時宜，特區政府唔會再考慮，甚至喺吹風會話：「香港現時要搞四高，即係高增值、高創意、高知識產權及高科技，你問我香港會唔會返轉頭再做膠花？我相信唔會，因為人工相差太大。」
嘩，乜鬍鬚曾唔知誠哥係靠穿膠花起家？真係食咗豹子膽！當時仲有傳唐英年1997年出任行會成員時提出嘅首項意見，就係喺河套設加工區，雖然政府拒絕咗，但外界認定佢同誠哥「裏應外合」。
八方斷估鬍鬚曾當年未必有諗過，有朝一日要爭入閘，唔知當年呢番話「童言無忌」，會唔會影響入閘之機？
李八方
mailto:[email protected]