對住丙組仔，柏高艾卡沙終於開到齋！巴塞今夏用咗3,000萬歐元（約2.4億港元）買咗柏高艾卡沙嚟做「MSN」嘅替補，但佢踢咗半季都未入過波。嚟到歇冬前最後一戰，巴塞喺西盃第四圈次回合主場對西丙嘅靴高斯，MSN全部放假，擔正嘅柏高艾卡沙終於射入加盟後第一球。
呢場阿達杜倫大演帽子戲法，盧卡斯迪治尼、拉芬拿艾簡達拿、拿傑迪錫各入一粒，最後大勝對手7:0，兩回合計以8:1晉級。放緊假嘅「MSN」就各自各精采，其中尼馬就同前女友布魯娜玩得好開心，佢哋分別扮成蝙蝠俠同貓女喺度玩Snapchat。而美斯則連續10年成為阿根廷足球先生。