你呢支飲品隊RB萊比錫恃住有大集團撐腰，就妄想挑戰拜仁慕尼黑嘅德甲大佬地位？咪以為贏幾場就有機，等大佬畀啲顏色你睇吓。喺周三嘅德甲榜首大戰，拜仁狂風掃落葉，半場就轟入萊比錫三球，最後主場維持贏3:0，成為冬季冠軍。如果唔係安聯球場嘅門柱開恩，萊比錫呢場分分鐘輸夠五蛋。
堤亞高踢到識飛
萊比錫喺紅牛集團支持下，七年內四次升班，今季終於嚟到德甲，可以同拜仁拗吓手瓜。兩隊賽前同分，唔通萊比錫真係可以實現改朝換代，打破拜仁壟斷？拜仁就話咪使旨意！德甲大佬地位備受挑戰，拜仁呢場踢得認真，入局超快，17分鐘羅拔利雲度夫斯基勁射中柱，堤亞高艾簡達拿門前補中射成1:0。堤亞高今場踢到八面玲瓏，成條中場俾佢玩晒，今場五次突破過人，六次截到對手傳球，仲有四次為隊友製造埋門，包括之後長傳畀杜格拉斯哥斯達勁射，但中柱彈出。25分鐘，堤亞高終於搵到助攻，傳畀沙比阿朗素，為拜仁射成2:0。
萊比錫教練︰寶貴一課
呢場嘅形勢就好似少年人對老師傅咁，萊比錫班後生仔係有衝勁，但輸經驗，被拜仁帶住嚟踢。30分鐘，萊比錫嘅科斯貝治仲從後鏟跌拿姆，直接領紅被逐。完半場前，羅拔仔主射12碼入網，拜仁半場遙遙領先3:0。換邊後，拜仁收油，但踢少個嘅萊比錫都搵唔到機會破蛋。如果唔係列貝利喺87分鐘射中楣，萊比錫應該仲要輸多粒；最後拜仁主場贏3:0，家陣以39分排榜首，領先萊比錫三分，坐穩今季德甲嘅聖誕冠軍。萊比錫教練夏辛侯迪都承認，同拜仁比佢哋仲未夠班，呢場波上咗寶貴一課，「當拜仁認真踢嗰陣，真係好難贏佢哋。今場拜仁教咗我哋寶貴一課，恭喜佢哋贏波，佢哋踢出最高水平。」
另外，今場嘅焦點係突然染咗一頭金毛嘅拜仁中堅曉姆斯，引起網民討論。佢賽後話同朋友打賭輸咗，所以今場要「找數」。