「Package男神」劉鳴煒，聖誕節會唔會同佳人過？八方當然唔知啦，只知佢喺聖誕節都好窩心，會向友好發送聖誕卡，而且張聖誕卡環保兼特別，睇埋下文就知點解嘞！
話說佢突然戴住頂帽，喺辦公室幅牆攞住支筆起勢咁畫，嘩，唔係受咗乜嘢刺激啩？大家唔好誤會，男神唔係喺佳節前嚇大家一跳，佢只係喺幅牆寫上「Merry Christmas & Happy New Year！」（仲要好sweet咁有個笑樣）。
佢寫完後就影埋相email畀友好，email主題好特別，叫做「Please excuse my handwriting……（請不要介意我的字體）」，大家若然唔開嚟睇，都未必知道係聖誕祝福。
男神亦搞笑話，擔心大家睇唔明佢手字，特別附上聖誕祝福嘅英文解說，似乎男神出任青年事務委員會主席後，真係零舍多諗頭，連寫聖誕卡都咁出位。