嚟到年尾，老老土土，點都要回顧一下今年球壇，但本報嘅球壇回顧過幾日就出街，所以小弟就費事重複講多次嗰啲李斯特城贏英超、基斯坦奴朗拿度贏金球獎呢啲正路嘢，呢篇想同大家分享吓過去一年做嘢嗰陣遇過嘅假新聞。
互聯網發達，社交網站越嚟越多人用，消息嘅傳播亦越嚟越快。作為傳媒，當然想將最快最新嘅資訊同讀者分享，但如果唔小心，有時會因快得錯，做咗幫兇，將錯嘅新聞傳出去。記得國足踢世盃外，爆冷輸咗畀敍利亞之後，就唔知邊度傳嚟嘅消息話，敍利亞為慶祝贏波，各方勢力宣佈停火兩日！美國同俄羅斯都搞唔掂嘅事，中國犧牲小我，輸吓波就可以幫敍利亞帶來短暫嘅和平，真係不得不佩服足球嘅魔力。不過，原來呢單嘢係流嘅，好在本報冇誤報到。
仲有係近期啲嘅，就係朗拿甸奴加盟查比高恩斯，有晒舉衫相，連英國《太陽報》都有轉載，唔通有圖真係有真相？好在，同事發現相中嘅細哨嘅身材好似當打之年咁瘦嘅，因為有懷疑，所以就冇落到張相。冇幾耐，真相大白，原來張相係細哨以前同贊助商影嘅，而細哨只係着過查比tee影相，根本冇着波衫同舉衫。
不過，講到最誇張、最好笑嘅假新聞，必屬內地某足球媒體「乜乜帝」，冇啦啦大字標題話全球獨家，指車路士炒咗干地（圖）。睇勻成個英國輿論，都冇人收到風，但嗰間中國媒體竟然收到獨家料，仲實牙實齒話經多方打聽，確認呢個消息，真係令人O晒嘴。結果，干地被某媒體詛咒完被炒後，佢唔單止坐穩帥位，仲喺英超一直贏波贏到家陣。
文：咖喱