2016年7月10日，係小弟好耐都未能釋懷嘅一日，歐國盃決賽（圖），法國接近10年後再打入大賽決賽，對上一次正正06年世界盃決賽，施丹以「頭槌」結束自己嘅球員生涯，互射12碼法國亦飲恨於意大利。相比10年前，法國有主場優勢，對手葡萄牙大賽未有成績，基斯坦奴朗拿度（C朗）亦慣性大賽隱形，但結果更令小弟失望。
C朗喺25分鐘傷出，對法國卻形成不利條件，因為輕敵、傲慢態度浮現，滿以為一支沒有C朗嘅葡萄牙不足為懼，結果浪費唔少入球機會，穆沙施素高、保羅普巴更加踢到心浮氣躁，結果對手加時最後一刻入波，令法國人心碎。
一次決賽失利，對法國未致於末日，起碼教練迪甘斯仍然留任，多名主力好似基沙文、保羅普巴等仍處當打之齡，以目前外圍賽戰績，兩年後世界盃仍然係熱門之一。但更惋惜係，基沙文拎到神射手及賽事最佳球員兩個大獎，理應獲得更多。基沙文都算係今年球壇罕有嘅悲劇英雄，能夠帶領班費唔高嘅馬德里體育會殺入歐聯決賽，結果都輸畀C朗效力嘅皇馬，搞到基沙文講明最憎C朗，去邊度都好，都唔會考慮加盟皇馬，25歲仔都充滿怨懟。2016年就快結束，基沙文過咗呢個傷心之年，係時候領法國及馬體會再出發。
話時話，迪甘斯都要考慮法國未來隊長位置人選，畢竟門將洛里斯都屬於文靜嗰類，保羅普巴決賽當時大吵大鬧，都冇人鎮得住佢，不過法國一向都唔少臭馬球王，簡東拿就係代表人物，既然普巴想做大佬，迪甘斯畀佢試一試亦何妨。
文：牽牛