去年喺九龍城區議會黃埔西擊退老將當選嘅鄺葆賢，最近喺醫學界嘅選委會戰事成為票后；唔知大家記唔記得，葆葆參選區議會時仲係青年新政成員，但佢今年中退出青政，與黃埔孖寶之一嘅游蕙禎分道揚鑣。葆葆話分開咗冇政黨加持，都唔太影響地區工作，因為有義工同街坊幫忙，面對游BB喺宣誓風波受到指摘，佢為舊戰友平反，話好多嘢都係莫須有。
指可以做好啲
葆葆喺商台節目話，都有街坊因為宣誓風波鬧自己，同時都有街坊為游BB同梁頌恆擔心，尤其係曾經同游BB相處嘅街坊。葆葆話事件最後變成咁大風波，唔係佢兩個人可以控制，其後有傳媒同群眾批鬥兩人，令佢覺得呢個唔再係自己熟悉嘅香港。
坊間有評論話佢兩個累街坊，葆葆就話有啲事情係莫須有，當然啦，事後睇番梗係可以做好啲、做得精明啲㗎，但如果只係批評而冇提供協助，只會令佢哋更孤立無援，總之佢兩個係有做得唔啱兼做得唔好嘅地方，例如「可以解釋好啲、用字諗得清楚啲」。咁又信唔信佢哋兩個係「鬼」以及宣誓風波只係劇本？葆葆就唔相信兩人係鬼，亦認為如果係劇本，佢哋就唔會搞到自己咁狼狽。
至於由醫入政當選區議員一年，葆葆話仲有好多進步空間，特別係喺公民教育方面做得唔夠多，希望有機會向市民講述公民理念、社區歷史等。
李八方
mailto:[email protected]