現年37歲的「索腿天后」陳敏之在昨日冬至報喜，為老公雷偉信（William）剖腹誕下重7磅11安士囝囝，她更應景給囝囝改乳名做「雷冬至」。敏之指囝囝腳長最似她，腳板也很大，樣貌就是靚仔老公倒模，她有意讓肚皮休息一年後再追女。
索腿天后陳敏之前年嫁給圈外男友雷偉信，婚後不設防造人成功，擇日昨日剖腹誕下重7磅11安士囝囝，母子平安，昨日適逢是冬至，冬大過年，敏之夫婦未為囝囝改名，笑言可叫他做「雷冬至」或「雷沙湯丸」，不過囝囝趕出世陪父母過冬至兼迎聖誕，絕對是最好的禮物。
似爹哋靚仔
敏之前晚低調入養和待產，她昨早即順利誕B，她先透過短訊簡單報喜：「母子平安，謝謝你們！他重7磅幾，好健康！」到傍晚在社交網貼出母子相，讓大家分享她為人母親的喜悅，留言：「各位uncle、auntie，我已經出咗世啦！我有7磅11，還擁有一雙大腳八，真係辛苦媽咪了。」
產後敏之雖疲倦，但難掩興奮，因為期待了九個月的小情人，終於見面，她昨在電話中說：「我真係好鍾意佢，生咗出嚟，睇極都唔厭。」索腿天后的囝囝雷冬至遺傳了媽咪長腿，敏之說：「囝囝仲有大腳板，臉形同頭形似爸爸，係佢倒模，似爹哋靚仔。」
問到產房情況，敏之說：「老公有陪我入去，捉實我手畀鼓勵我，不過佢冇剪臍帶，因為佢又要影相又要拍片，好忙碌。」看着雷冬至出世，夫妻都非常感動，她說：「由於囝囝頭形大，所以出世時，醫生用夾輔助夾佢出嚟，所以頭部有啲瘀痕，我好心痛，但醫生話大約兩、三日就退。」是否特別擇日冬至剖腹，敏之說：「呢日係老公揀。」堪輿家麥玲玲大讚雷冬至命格好，及她再生可得女兒，敏之心中有數有追女大計，除湊成好字，索腿天后也有接班人，她說：「剖腹生都要調理番身體先，最快一年後。」
計劃百日宴
敏之昨日剖腹生產後，表示傷口有痛，今日才會嘗試下床，還要吊鹽水未能進食，她說：「生完我好肚餓，陀B時食大咗個胃，聽日先可以食嘢，所以我未嘗試餵人奶。」她有意明年為囝囝搞百日宴。
視敏之為妹妹看待的伍詠薇，升呢「大姨媽」的她昨早亦代報喜：「敏之生咗個仔，好得意、好得意，佢叫我代報平安，大姨媽好開心、好開心，一切盡在不言中，家有喜事。」伍姑娘主演的舞台劇《嬉春酒店》今晚開騷，大姨媽瞓身綵排，明日才會到醫院探雷冬至，她說：「過兩日同老公（練海棠）、哥哥去醫院探敏之，到時先送禮物 。」
採訪：楊定
【冬至命格】BB好聰明財星旺
肖馬37歲的陳敏之昨日冬至榮升做媽咪，誕下逾7磅重的囝囝，敏之擇日冬至剖腹生仔，肖猴的「雷公子」命格特別好，堪輿師麥玲玲在電話中說：「冬大過年，今日出世，尤其係男仔會幾叻，運氣唔錯，將來會有大成就。佢屬火，財星旺，同父母緣好深。」麥玲玲表示雷公子有藝術天份，學藝會快上手，也適合演藝事業發展，麥玲玲續說：「BB命格會有一個妹妹。」
另一堪輿師陳定幫昨日也說：「BB屬金火，好聰明，但性格會少少急，佢藝術天份好強，比正統學科好，佢學音樂同體育會較精，BB同父母宮好夾，尤其同媽咪好親近。」