於球場上就如著名足球員C.朗拿度般，入完波之後，例牌都會懶型，整個霸氣動作等隊友過來慶祝。其實好多騎師贏完馬，亦都有佢既招牌慶祝動作，好似布文、雷神莫雷拉、潘頓甚至韋達，招牌動作多數都係舉行OK或者勝利手勢，不過睇得多都會有啲悶。唯獨杜滿萊扮飛機叫做有啲新意啦！
後來騎師蔣嘉琦嘉琦BB冒起，小妹妹贏完馬慶祝動作唔算大，始終都係女仔吖嘛，梗係有啲矜持㗎啦！但係嘉琦妹總會露出甜甜既笑容，唔單止麻甩佬會暈得一陣陣，就連「翡翠紅星」馬主董太都攬吓佢，錫錫佢，你睇，場面幾溫馨！
澳洲籍騎師貝湯美以前贏完馬，都會做招牌式既慶祝手勢，但自從佢孖生兄弟貝禮頓不幸去世後，有段時間贏完馬都會向天祈禱，希望將頭馬獻俾兄弟，場面都幾感人。
不過講到夠誇張，夠激情，肯定係英國前冠軍戴圖理，因為佢一贏完馬就從馬上面跳落嚟，相當瀟灑。
好嘅嘢自然多人學，柏寶都嚟番個戴圖理式慶祝動作！都似模似樣喎！嗱，如果你好似Ｄ體操運動員，加埋啲乜360度空翻加轉體兩周半先落地，當然即刻寫個「服」字俾你！