長和系主席李嘉誠唔使煩惱今年送咩聖誕禮物畀紅顏知己周凱旋嘞，事關伊人已經睇中一件「超級戰衣」SuperFlex！
呢件戰衣原理係加強肌肉堅韌度，令行動不便嘅人有番活動能力，主要目標係潛力龐大嘅銀髮市場，運動員或者受傷後復康人士都適用。
SuperFlex已經籌到960萬美元，A輪投資者就包括周凱旋主理嘅維港投資、Root Ventures、Sinovation Ventures，同埋孕育呢班發明家嘅SRI。
暫時呢件「衫」就比較笨重，着上身反而行動不便，開發SuperFlex嘅Mahoney就希望借助團隊入面時裝界嘅專才，令件衫真正投產時會更加貼近真實衣服，等用家着上身之後，不但行動自如，仲可以好似平時咁襯衫，最快等到2018年有實物睇。