星爺經典電影之一《少林足球》，少林隊除咗魔鬼隊呢個終極對手外，茅招多多嘅汽車維修員隊，都令星爺幾位師兄弟食咗唔少苦頭，大師兄仲舉白底褲投降㖭。原來葡萄牙第四級聯賽葡丙，都有支同汽車維修員一樣咁茅嘅球隊，好多對手怕晒佢哋，寧願投降唔比賽，不過佢哋就冇舉起白底褲，而係寧願罰款750歐元都唔出戰啫。
對手驚驚寧棄賽罰錢
葡丙汽車維修員隊「Canelas 2010」（下圖）其實都唔係咩大會，而係由波圖球迷會成員喺2010年組成，不過搞咗幾年，已經惡名遠播。由於Canelas 2010部份成員係波圖球迷會骨幹，都有一定勢力，所以比賽前恐嚇吓球證，搞到執法寬鬆，Canelas 2010就越踢越茅。大家只要喺youTube打Canelas 2010就搵到呢班波嘅片段，飛腳、飛鏟、批踭樣樣齊，爭在未出士巴拿。Canelas 2010近17場聯賽不敗兼贏咗16場，但當中有12支球隊賽前寧願罰錢都唔想對佢哋箒。國內樂視微博就有論壇讚呢隊波成績仲好過巴塞、皇馬，不過就有球迷猛烈反駁，話靠暴力招數贏波，一啲都唔光彩。
