袁偉豪日前喺頒獎禮上面，公開感謝前度岑杏賢，令所有人都覺得佢好後悔同岑杏賢分手，好內疚。前晚岑杏賢同好友朱千雪、陳庭欣一齊到尖沙嘴撐師妹麥明詩處女作《失戀日》首映，對於袁偉豪嘅感言，岑杏賢似乎唔係特別感動。
問會唔會回心轉意？岑杏賢話：「暫時唔會去諗喇！分開一個月大家都係需要時間適應，做朋友相處得好開心。」岑杏賢直認兩人仲有聯絡，袁偉豪會唔會有機會呢？岑杏賢企得好硬：「問得好好，我都會諗應該畀幾多次機會？我同佢之間我哋最清楚，三年入面，我唔係冇畀過機會，已經唔係第一次機會，細節我唔講，我好明白大家好關心我哋！好想我哋復合，但係今日決定分開，我唔知點樣維繫一段失去信任嘅感情。」
Stephy邀小方怕尷尬
至於鄧麗欣（Stephy）同麥明詩都係今年宣佈同男友分手，Stephy話有諗過叫方力申嚟睇首映，但又怕尷尬，仲有諗過叫導演改戲名，佢話：「覺得佢係喺傷口灑鹽，唔想俾人覺得係炒作，但原來係講家人。」戲中Stephy仲俾飾演佢媽媽嘅金燕玲摑到爆。而麥明詩同劉浩龍今個聖誕都要喺工作中度過，問林作有冇預先送禮物？麥明詩話：「12月11號係我生日，嗰日收到朋友夾錢送嘅iPad。唔知佢（林作）有冇份，返去睇吓先。」
撰文：馮仁昭